ရာခေလသည် မည်သူနည်း

၁။ သမိုင်းကြောင်းလေ့လာခြင်း။

            ရာခေလသည် ဓမ္မဟောင်းတွင် အဓိကနေရာတွင်ဖေါ်ပြပါရှိပြီး၊ လာဗန်၏သမီး၊ လေအာ၏အစ်မ၊ ယာကုပ်၏ နှစ် သက်မှုကိုခံထားရသောဇနီးနှင့် သားနှစ်ဦး၏မိခင်အဖြစ်ထင်ရှားပါသည်။

 

၂။ ယာကုပ်နှင့်တွေ့ရန်အကြောင်းဖန်လာခြင်း။

            ရာခေလသည် ခါရန် (သို့) ပါဒနာရံ တွင်နေထိုင်ပြီး၊ ထိုအရပ်မှာပင် ဝမ်းကွဲအစ်ကိုယာကုပ်နှင့်တွေ့ဆုံ ခဲ့သည်။ ယာကုပ်သည် အစ်ကိုဖြစ်သူ၏ သားဦးအရာကိုလှည့်ဖြားယူခဲ့ခြင်းမှ ထွက်ပြေးလာသူတစ်ဦးဖြစ်သည် (က၊ ၂၇:၁-၂၉)။ ထိုသို့ ထွက်ပြေးရန်မိခင်ဖြစ်သူမှပင်လျင် လမ်းကြောင်းပေးခဲ့ခြင်းဖြစ်သည် (က၊ ၂၇:၄၃)။

            ခါရန်အရပ်သို့ ယာကုပ်ရောက်သောအခါ သိုးကျောင်းသားများကိုရေတွင်းအနီး၌တွေ့၍ မေးမြန်း လေသည်၊ ထိုအခါ “သူ၏သမီးရာခေလသည် သိုးများနှင့်တကွ လာလိမ့်မည်ဟု ဆိုကြလေ၏” (က၊ ၂၉:၆)။ ထို့နောက်ယာကုပ်သည် ရေတွင်း၌ ဖုံးထားသောကျောက်ကိုဖယ်ရှား၍ ဦးလေးလာဗန်၏သိုးများကို ရေတိုက်ပြီး၊ ကိုယ်တိုင်လည်း လာဗန်၏တူဖြစ်ကြောင်းကို မိတ်ဆက်လေသည်။ ထိုအခါရာခေလသည် ဖခင်ထံသို့အကြောင်းစုံပြောပြပီး၊ ယာကုပ်အား မိသားစုများနှင့်အတူနေရန် ဖိတ် ခေါ်မှုကိုရရှိခဲ့သည်။

 

၃။ ယာကုပ်၏ အစေခံခြင်း။

            ယာကုပ်သည် ထိုသို့ဖြင့် တစ်လခန့်အိမ်မှုကိစ္စများကိုလုပ်ဆောင်ပေးအပြီးတွင် ဦးလေးဖြစ်သူမှ သူ့အားတစ်စုံ တစ်ခုသောအဖိုးအခကိုရစေမည်ဆိုကာ စကားကမ်းလင့်ခဲ့သည်။  ယာကုပ်သည်ထိုတစ်လတာအတွင်း၌ ရာခေလ၏ အလှ ကွန်ယက်တွင်ကျဆင်းနေပြီးဖြစ်၍  သမီးအကြီးဖြစ်သော လေအာအစား ရာခေလအတွက် ခုနှစ်အစေခံမည်ဟူ၍ သဘော တူခဲ့သည်။

            ထိုသို့ဖြင့်ခုနှစ်နှစ်အစေခံရခြင်းကို “ယာကုပ်သည်လည်း၊ ရာခေလကို ရခြင်းငှါ ခုနစ်နှစ် အစေခံလေ၏။ ရာခေလကို ချစ်သောကြောင့်၊ ခုနစ်နှစ်ကို နည်းသောနေ့ရက်ကဲ့သို့ ထင်မှတ်သတည်း” (က၊ ၂၉:၂၀) ဟုဆိုထားပါသည်။

 

၃။ အစဉ်အလာထိမ်းမြားခြင်းမင်္ဂလာ။

            ထိုသို့ဖြင့်ခုနှစ်နှစ်စေ့သောအခါ ဦးလေးဖြစ်သူအား ထိမ်းမြားပေးရန်တောင်းဆိုခဲ့သည်။ ထိုအခါ ဦးလေးဖြစ်သူမှ ရာခေလအစား လေအာဖြင့်ထိမ်းမြားပေးခဲ့လေသည် (က၊ ၂၉:၂၁-၂၃)။

            နှုတ်ကပတ်တော်၌ အသေးစိတ်ဖေါ်ပြမထားသော်လည်း ယာကုပ်သည်ယစ်မူးလွန်နေသဖြင့် လေအာ မှန်းမသိပဲ မင်္ဂလာအထမြောက်ခဲ့သည်ကို နောက်နေ့မိုးလင်းမှသိမြင်ခဲ့ရသည်။  ထိုအခါ ဦးလေးဖြစ်သူအား မေးမြန်ရာ၌ ဦးလေးက “နံနက်အချိန်ရောက်မှ ယာကုပ်သည် ကြည့်ရှုသောအခါ၊ လေအာဖြစ်ကြောင်းကို သိမြင်လျှင်၊ လာဗန် ထံသို့သွား၍ ကျွန်ုပ်၌ ပြုသောအမှုကား၊ အဘယ်သို့နည်း။ ကျွန်ုပ်သည် ရာခေလကို ရခြင်းငှါ အစေခံရပြီ မဟုတ်လော။ ကျွန်ုပ်ကို အဘယ်ကြောင့် လှည့်စားရသနည်းဟု ဆိုသော်၊ လာဗန်က၊ ငါတို့ပြည်၌ သမီးအကြီးကို မပေးစားမှီ၊ အငယ်ကို မပေးစားရ” (က၊ ၂၉:၂၅-၂၆) ဟူ၍ပြန်ဆိုခဲ့ပါသည်။

 

၄။ ရာခေလအဖို့ ထပ်မံ၍ အစေခံရခြင်း။

            ဦးလေးမှ ရာခေလကိုလိုလျင် နောက်ထံခုနှစ်နှစ်အစေခံရမည့်အကြောင်းနှင့် ထိုသို့သဘောတူခဲ့လျင် ခုနှစ်ရက် လွန်မြောက်ထိမ်းမြားပေးမည်ဟုဆိုခဲ့သည်။ ထိုသို့ဖြင့် ရာခေလအဖို့  မတရားမှုမှန်းသိသော်လည်း ခုနှစ်နှစ်ယာကုပ်အစေခံ ခဲ့သည် (က၊ ၂၉:၂၇)။ ထိုသို့ဖြင့် လေအာထက် ရာခေလကိုယာကုပ်ပိုချစ်မြတ်နိုးခဲ့သည် (က၊ ၂၉:၃၀)။

            ထိုဖြစ်စဉ်ကို ဘုရားသခင်မြင်တော်မူသောအခါ လေအာကိုသနားတော်မူ၍ ရုဗင်၊ ရှိမုန်၊ လေဝိနှင့် ယုဒဟူသော သားလေးဦးကိုဆုချပေးသနားတော်မူခဲ့သည်။ ဘုရားသခင်သည် လေအာမသိနိုင်သော နည်းလမ်းဖြစ်သည့် ကယ်တင်ရှင်မှာ သူ့မျိုးနွယ်အားဖြင့်ချီးမြောက်တော်မူခဲ့ခြင်းဖြစ်သည် (ဗျာ၊ ၅:၅၊ မ၊ ၁)။

၅။ အလိုလောဘဖြင့်ပြည့်သူ။

            ရာခေလသည် အစ်မဖြစ်သူသားသမီးရ၍ မိမိမှာမြုံနေမှန်းသိသောအခါ အစ်မကိုမနာလိုစိတ်နှင့်အတူ ခင်ပွန်းဖြစ် သူကိုဖိအားပေးလျက် တောင်းဆိုမှုများပြုခဲ့သည်။ ယာကုပ်သည် သားဖွားခြင်းအခွင့်ကို ပေးပိုင်သူ မဟုတ်မှန်းသိသောအခါ ဇနီးဖြစ်သူကို စိတ်ဆိုးခဲ့သည် (က၊ ၃၀:၂)။ ထိုအခါ ရာခေလသည် ကျွန်မဗိလဟာကို ဇနီးအဖြစ်သိမ်းယူစေ၍ သားသမီးများ ကိုရယူရန်ဖန်တီးခဲ့သည်။ ထိုခေတ်က ယဉ်ကျေးမှုအတိုင်း ဗိလဟာ အားဖြင့် “ဒန်” နှင့် “နဿလိ” ဟူသောသားနှစ်ဦးကို ရရှိ ခဲ့သည်။ ထိုအချိန်တွင် လေအာမှလည်း သူ့ကျွန်မကို ပေးအပ်၍ ယာကုပ်အားဖြင့် အခြားသားများကိုလည်းရရှိခဲ့သည်။

၆။ ညီအစ်မနှစ်ဦးကြား ပြဿနာ။

ညီအစ်မနှစ်ဦားကြားပြဿနာသည် ထိုမျှနှင့်မပြီးသား တစ်နေ့ လေအာသားဖြစ်သော ရုဗင်မှ “အနု ဆေးသီး” ကိုရ လာချိန်တွင် ရာခေလသည် ထိုဆေးအားဖြင့် ကလေးရယူမည်အကြံနှင့် အစ်မဖြစ်သူထံ အလှဲအလှယ်ပြုခဲ့သည် (က၊ ၃၀:၁၄)။

ထိုအနုဆေးသီးအားဖြင့် ကလေးရနိုင်သည်ဟူသော ထိုခေတ်ကယုံကြည်ချက်အတိုင်း အစ်မဖြစ်သူကို ပြောသော အခါထို့အတွက် ခင်ပွန်းဖြစ်သူအား သူနှင့်နေခွင့်ပေးရမည်ဟူသော သဘောတူညီမှုကို ပေးလိုက် သည်။ ထိုသို့ဖြင့် လေအာမှာ ခင်ပွန်းဖြစ်သူနှင့် “ဣသခါ” ဟူသောသားကိုရ၍၊ ထို့နောက်တစ်ဖန် “ဇာဗုလုန်” ဟူသောသားတစ်ဦးနှင့်အတူ “ဒိန” ဟူသော သမီးတစ်ဦးကိုလည်းမွေးခဲ့သည်။

ရာခေလ၏စိတ်ထားမည်သို့ပင်ရှိစေ ဘုရားသခင်သည် ရာခေလအားသနားတော်မူ၍ သားကိုပေး သနားတော်မူရာ ၌ “ယောသပ်” ကိုရာခေလဖွားမြင်ခွင့်ရရှိခဲ့သည်။

 

၇။ မတော်လောဘဖြင့်ပြုသူ။

            ယာကုပ်သည် ဦးလေးထံမှထွက်ခွါပြီး နေရင်းမြေဖြစ်သော ခါနန်သို့ပြန်သွားခဲ့သည်။ ဦးလေးဖြစ်သူမှ အင်အားနှင့် အတူလိုက်လာ၍ မိသောအခါ မိသားစုကိုးကွယ်သော ရုပ်တုကိုခိုးယူကြောင်းစွပ်စွဲခဲ့သည်။ ယာကုပ်အနေဖြင့် ရာခေလကိုယ် တိုင်ယူဆောင်လာကြောင်းမရိပ်မိပဲ “သင်၏ဘုရားတို့ကိုမူကား၊ အကြင်သူ၌ တွေ့ လျှင်၊ ထိုသူကို သေစေလော့။ ကျွန်ုပ်တို့ ညီအစ်ကိုများ ရှေ့တွင်၊ သင်၏ဥစ္စာကိုပြညွှန်၍ ယူပါလော့ဟု၊ လာဗန်အားပြန်ပြော၏” (က၊ ၃၁:၃၂)။

            ရာခေလသည် ထိုရုပ်တုအား ဘာကြောင်းခိုးလာကြောင်း နှုတ်ကပတ်တော်၌ အသေးစိတ်ဖေါ်ပြ မထားပါ။ အခြား ဖြစ်နိုင်ခြေမှာ ထိုရုပ်တုသည် အဖိုးတန်ပစ္စည်းများဖြင့် ထုလုပ်ထားကြောင်းဖြစ်နိုင်ပါသည်။ ထို့ကြောင့်လည်း ခိုးလာဟန်တူ  ပါသည်။ ထို့အတူ ထိုရုပ်တုသည် အစွမ်းတန်ခိုးရှိသည်ဟုယုံကြည်၍ ယူလာ သည်လည်းဖြစ်နိုင်ပါသည်။ ထို့ကြောင့်လည်း ဖခင်ဖြစ်သူမှ တစ်ဦးပြီးတစ်ဦးကိုရှာကြံသောအခါ မြင်းထိုင်ခံ အောက်၌ဝှက်ထားပြီး “ရာခေလက၊ သခင်ရှေ့မှာ ကျွန်မ မထနိုင်သည် ဖြစ်၍၊ စိတ်ရှိတော်မမူပါနှင့်။ မိန်းမတို့၌ ဖြစ်မြဲရှိသည် အတိုင်း၊ ကျွန်မ၌ဖြစ်ပါသည်ဟု အဘအား ဆိုလေ၏။ ထိုသို့လာဗန်သည် ရှာဖွေ၍ ရုပ်တုတို့ကို မတွေ့ရ” (က၊ ၃၂:၃၅) ဟုဆိုခဲ့သည်။

 

၈။ ရာခေ၏ နောက်ဆုံးအချိန်။

            ထိုသို့ဖြင့် နှစ်အတန်ကြာလေသောအခါ ရာခေလထပ်မံ၍ကိုယ်ဝန်ရှိလာသည်။ ထိုသို့ဖြင့် မီးဖွား ချိန်ရောက်သော် လွန်စွာခက်ခက်ခဲခဲဖြင့်မီးဖွားခဲ့ရသည်။ ထိုသို့ဖြင့် နောက်ဆုံးအသက်မထွက်မှီ “ဗေနောနိ” ဟူသော အမည်ဖြင့် မှည့်ခဲ့သည်။ အဓိပ္ပါယ်မှာ “ဒုက္ခဖြင့်ယှဉ်သောငါ့သား” ဟုဆိုသော်လည်း ယာကုပ်သည် ထိုသားကိုလွန်စွာချစ်၍ “ဗင်္ယာမိန်” ဟူ၍ “ငါ့ ညာ လက်ရုံး” ဟူသောအစွဲဖြင့်မှည့်ခေါ်ခဲ့ပါသည် (က၊ ၃၅:၁၈)။

            ရာခေလအား ဗက်လင်အနီး ဧဖရက်ဟူသောအရပ်တွင် မြုပ်နှံပေးခဲ့သည် (က၊ ၃၅:၂၀။ ရာခေလ အကြောင်းကို မြည် တမ်းစကားတွင်အောက်ပါအတိုင်း “ထာဝရဘုရား မိန့်တော်မူသည်ကား၊ ရာမအရပ် ၌ သည်းစွာသော ညည်းတွားငိုကြွေးခြင်း အသံကို ကြားရ ၍၊ ရာခေလသည် မိမိသားတို့မရှိသောကြောင့်၊ ငို၍ စိတ်မပြေနိုင်” (ယေရမိ၊ ၃၁:၁၅)ဟု ဖေါ်ပြထားရှိသည်။

            ထိုနေရာ၌ ရာမအရပ်ဟူသည် ရာခေလ၏သား ဗင်္ယာမိန်နယ်မြေရှိ မြို့တစ်မြို့အမည်ဖြစ်သည်။ ပရောဖက်သည် ယာခေလအား သိမ်းသွားခြင်းခံရသောသူများအတွက်ငိုကြွေးမြည်တမ်းခြင်းကို တင်စားလျက် ပုံဖေါ်ထားခြင်းဖြစ်သည်။ ဓမ္မသစ်တွင် ယေရမိစကားကိုလည်း ဗက်လင်ရှီကလေးများအား ဟေရုဒ်မင်း သတ်ဖြတ်ချိန်တွင် ထိုအတိုင်းအသုံးပြုထားမှု ကိုတွေ့ရသည် (မ၊ ၂:၁၇-၁၈)။

၉။ စံပြုအပ်သော ချစ်ခြင်းမေတ္တာ။

            ရာခေလနှင့် ယာကုပ်၏ချစ်ခြင်းမေတ္တာမှာ နှုတ်ကပတ်တော်၌ အကြီးမားဆုံးသော မေတ္တာတရားကို ပုံဖေါ်ထား ပါသည်။ ယာကုပ်သည် သူ့သား ယောသပ်၊ ဗင်္ယာမိန်တို့ကို အခြားသောသားသမီးများထက် ပိုချစ်သည်။ အထူးသဖြင့် ရာခေလနောက်ဆုံး မွေးခဲ့သောယောသပ်ကို အားလုံးထဲတွင် ပို၍ချစ်မြတ်နိုးခဲ့သည် (က၊ ၃၇:၃)။ အထူးသဖြင့် ယောသပ်ကို ပို၍မျက်နှာသာပေးခွဲခြားမှုကြောင့် အိမ်တွင်းရေး ညီအစ်ကိုအကြားမှာ ပင်လျင် ပြဿနာများဖြစ်ပွားခဲ့ရသည်။

            ထိုသို့ဖြင့် ယောသပ်ကို အခြားညီအစ်ကိုများက အီဂျစ်သို့ရောင်းစားခဲ့ကြသည်။ မည်သို့ပင်ဆိုစေ ထိုဖြစ်စဉ်များ အားလုံးတို့သည် ကယ်တင်ရှင်ကြွလာမည့်အရေးမှအစ ကယ်တင်ခြင်းအထိ ဘုရားသခင့် အကြံအစည်တော်မှ အစိတ်အပိုင်း အချို့တို့ပင်ဖြစ်ပါသည်။

နာမတော်မြတ်၌

ဆယ်မြူရယ်စိုးလွင်

 

 

မှတ်ချက်။ Who was Rachel in the Bible? အားမြန်မာမူပြုပါသည်။